التاج رقم اتنين باتت الإجابة عليه ضرورة من ضروريات الحياة.. لزمن و لابد أجاوبه علشان أنقل على اللي بعده و اللي بعده.. هو مفيش غيري في البلد بتتمررله تاجات و لا إيييييييييه !!!
المرة دي التاج من صديقتي د. أسماء علي اللي رديت لها الجميل في التاج اللي فات و هأفضل وراها لحد ما تجاوب.. و نبدأ بسم الله الرحمن الرحيم نجاوب.. ثواني أشرب بعض الماء.. لحظات أمسح قطرات العرق عن جبيني.. لحظة أخرى كي أفتح باب السايبر للتهوية الجيدة.. لم يعد هناك شيء غير الإجابات..
1- هواياتك ؟!!
طب بالذمة ده كلام ؟!.. هواياتي واضحة أكيد.. القراءة.. مشاهدة الأفلام الأجنبية.. الكتابة كذلك.. مطاردة الأطفال الأوغاد بالمكنسة.. خنق القطط في القبو المظلم ليلا.. و هكذا من الهوايات المحببة للنفس.. كمان بحب جدًا أتفرج على الخناقات.. لو ماليش حد فيها يستدعي تدخلي أحب أتفرج جدًاااا ساعتها.. و يا سلام لو انقلبت لخناقة دموية.. بحب أشوفهم إزاى بيتدرجوا من الشد و الجذب للضرب و الهياج.. هواية غريبة شوية !!
2- أشهر عيوبك ؟!!
ممممممم.. أشهر عيوبي بالنسبة لي و لا أشهر عيوبي عند الناس ؟!.. لو عندي أنا يبقى الإهمال و الكسل.. عند الناس الكسل.. بس أحب أقول إنه مش كسل على أد ما هو نوع من التمرد السلبي على تحقيق رغبات الآخرين.. هذا يطلب مني شيء و هذا يطلب مني شيء آخر.. فلا أفعل هذا و لا ذاك كنوع من التمرد و الرفض السلبي.. فأوصم بالكسل.. و تدريجيًا صار من سماتي و عيوبي.. للأسف طبعًا !!
3- حاجات بتكرهها جدًا ؟؟!!
الأوااااااااااامر.. الظلم.. البجاحة.. بالذات البجاحة.. لما يكون واحد غلطان و عارف إنه غلطان و تلاقيه كمان مش عاجبه أنك بتقوله أنه غلطان.. و تاخده العزة بالإثم كده و ناقص يقولك اشرب من البحر.. كان في واحد بيطلع في التليفزيون ميصحش نتكلم عنه دلوقتي لأنه اترقي و بقى ماسك محافظة بحالها.. هو بالظبط الحالة بتاعة العزة بالإثم ده.. تقوله بص الصور و الناس عاملة إزاى يقول كذب و تلفييييييييق.. ساعتها أبقى عاوز أنط فى التليفزيون و اقعد مكان عمرو أديب (ما هو عمرو و أنا عمرو مش هتفرق) و أفتح كرش صاحبنا ده !!!
4- حاجات بتحبها أوي و مش بتمل من تكرارها ؟!!
الكتابة.. القراءة.. الجلوس على النت.. النزول من بيتنا.. شرب كوفي ميكس..
5- سؤال بيستفزك جدًا ؟!!
و هو أن حد يسألني و يقولي: إيه أكتر سؤال بيستفزك جدًا ؟.. هههههههههههههههه.. لا بجد.. في سؤال مش مستفز بقدر ما بيضايقني و بيحيرني فى إجابته.. و هو: إنت بتصلي و لا لأ !!!
طب أجاوب أقوله إيه ؟!.. أصل اللي بيسأل ده حاجة من اتنين.. واحد قريب مني أوي و بيسألني بحكم القرب ده.. و ده من حقه يسأل.. إنما حد معرفوش أو علاقتي بيه مش متينة للدرجة.. أقوله إيه ؟ لو قلت آه يبقى بأنافق و عاوز أتفاخر قدامه بإني بأصلي.. و لو قلت لأ ييجي السؤال الأكثر استفزازا.. طب ليه مش بتصلي ؟!.. هأقول إيه يعني ؟! حقيقي الإجابة محيرة !!!
6- أمنيتي في الحياة ؟!
أني أكون صاحب قراري.. مش عروسة في إيد محرك عرايس فرحان إنه بيعرف يحرك و خلاص !!
7- حاجات مؤمن بيها جدًا ؟!
إن الله لا يضيع أجر من أحسن عملا..
8- أكتر حاجة فاشل فيها ؟!!
ما بلاش سيرة الفشل دلوقتي الواحد حاسس إنه غرقان فيه.. المهم يعني.. اكتر حاجة فاشل فيها الالتزام بجدول زمني لعمل شيء.. أحط جدول للمذاكرة (أيام المذاكرة بقى) من خمسة لستة هأذاكر جغرافيا النبات.. و من ستة لسبعة هأذاكر مدي تأثير البطيخ فى العقلية المصرية.. و من تمانية و نص لعشرة و تلت هأذاكر تاريخ أمنا الغولة.. و في الآخر أبدأ مذاكرة أساسا الساعة حداشر بعد ما أكون شفت فيليمين و مسرحية و كام فيديو كليب.. رائع يعني !!
9- وظيفة بتحبها ؟!
مؤلف قصص.. لو دي كانت وظيفة يعني.. غير كده مفيش !!
10- مثلك الأعلى في الحياة (و هو سؤال المليون) ؟!
في ناس كتير تسألها مثلك الأعلى مين ألاقيهم بيجاوبوا بسرعة و بكل سهولة.. بأحسدهم الصراحة.. لأني بجد محتار في إجابة سؤال زي ده.. في مثل أعلى شامل لكل حاجة ؟! مفيش غير الرسول عليه الصلاة و السلام.. و هو فعلا خير مثل أعلى ممكن أقتضي بيه.. بس لو فصصنا المثل الأعلى لكذا حاجة.. هألاقي إن صلاح الدين الأيوبي مثل أعلى ليا فى الأخلاق الحربية وقت الحرب.. هألاقي سيف الدين قطز فى الذكاء و الشجاعة و حسن تدبير الأمور.. هألاقي خالي في التضحية.. هألاقي (أدهم صبري).. هألاقي أي واحد ناجح في حياته و ملتزم بأخلاقياته و متمسك بمبادئه و قيمه..
يا ترى كسبت المليون ؟!
ده بقى راجع لكم تحكموا..
المرة دي أمرر التاج لمين ؟!
تمرره لمين يا واد يا عمرو ؟!
لقيته..
محمد عبد السميع.. الديليكون.. جاوب يا صديقي يمكن تفوز بالمليون !!
بس خلاص
تصبحوا على خير
