مــعًــا ســنــغــيـــر..

الكل ينادي بالتغيير، وهي حقيقة واقعة ولا أحد ينكر ذلك..

القوى والتيارات السياسية بمختلف توجهاتها بتنادي بالتغيير، ومفهوم عايزين يغيروا إيه، ومين.. ده كمان فيه عندك جمعية وطنية للتغيير، يعني الموضوع مش صغير.. صنّاع الكتب الخارجية بينادوا بتغيير قرار وزير التعليم، وياحبذا لو تغيير الوزير على بعضه كمان.. جمهور السينما بينادي بتغيير موجة الأفلام اللي شغالة دلوقتي بداية من أفلام سعد الصغير لحد أفلام سعد الكبير "محمد سعد" وجمهور الأغاني بينادي بتغيير ماسورة المغنيين اللي بيطلعولك من كل قناة، كلهم شبه بعض وبيقدموا أغاني مستهلكة الكلمات واللحن ومتعرفش إيه علاقة الكليب بالأغنية أصلا، بس ده له موضوع تاني خلينا في التغيير دلوقتي.. ده حتى جمال مروان في حملة ميلودي دراما عايز يغير شعار الحملة ويخليها ميلودي تتحدى قلة الأدب رغم أن الحملة مليانة قلة أدب عالآخر..

طب يعني وقفت عليا أنا؟!

أنا كمان قلت لازم أغير، مش هدومي طبعًَا، لأ.. قلت لازم أغير شكل المدونة.. أغير الستايل والألوان والأغنية الكئيبة اللي كانت شغالة الأول، رغم أني بحبها جدًا لحد دلوقتي، وبحب المطربة لينا شماميان جدًا جدًا، بس منكرش أن الأغنية كانت كئيبة..

قلت لازم أغير من متابعتي "شبه المعدومة" للمدونة وأكتّر من نشاطي وكتاباتي عليها.. هو أنا عاملها عشان أركنها؟!

أشيل البانر القديم وأحط واحد مكانه، قعدت حوالي 3 أيام بفكر في شكل بانر جديد يكون مناسب.. لحد ما صحيت من كام يوم والفكرة بتختمر في دماغي وعلى ما خلص اليوم كنت نفذتها.. أصل بما أني قررت أغير اسم المدونة كمان وأخليها "خلطبيطة" على اسم آخر كتاب ليا.. يبقى لازم البانر يكون خلطبيطة، بس بنظام، زي ما أنا في حياتي بالظبط.. وكانت النتيجة زي ما أنتوا شايفين..

المشكلة التانية كانت في الأغنية.. عايز أحط أغنية مبهجة شوية.. لقيت الموسيقى اللي بعشقها من افتتاحية مسلسل Dexter أفضل مسلسل ممكن أشوفه في حياتي كلها.. بس إزاي أعملها مكان القديمة، والقديمة محتاجة امتدادات rm و....... شغلانة يعني.. لحد ما "سارة" -صديقتي العزيزة- دلتني على موقع جميل اسمه Mixpod عملت منه البلاي ليست الموجودة دلوقتي.. يعني مش أغنية واحدة ولا مقطوعة واحدة.. لأ.. أكتر من واحدة.. وزي ما أحب، لو عايز أحط 50 أو 100 مش هيقول لأ.. اخترت أفضل الأغاني والمقطوعات الموسيقية المبهجة واللي في نفس الوقت بحبها برضو جدًا وحطيتها ورتبتها وظبّطتها وبقى كله تمام..

بالمناسبة هتلاقوا من ضمن أغاني البلاي ليست، أغنية شبيك لبيك لـ فرقة زمان ZaMaN.. اللي متابع معايا هنا هيكون عارف فرقة زمان كويس.. الأغنية دي كلمات: أحمد عز الدين عضو الفرقة وأخويا، وألحاني كمان :D:D يعني اللي يسمعها يقول رأيه بصراحة بقى..

المدونة فضلت بشكلها القديم من أول ما عملتها في أبريل 2007.. فضلت 3 سنين زي ما هي لحد ما أنا زهقت والناس كمان زهقت.. ودي مجرد 3 سنين بس مش 30 سنة -ربنا يكون في عوننا والله- المهم يعني أني كنت خايف من التغيير ومش عايز أفكر فيه رغم أن كتير من أصدقائي كانوا بيطلبوا مني أغير الشكل وأجاري العصر.. بس كنت مستريح مع الشكل القديم.. وخلاص فاض الكيل وانتهى الأمر..

دلوقتي قدامكم الشكل الجديد والاسم الجديد.. البانر الجديد والبلاي ليست الجديدة.. وغالبًا "عـمـرو" كمان جديد..

ياترى كويس ولا؟؟