أنا كده تراكم عليا أكتر من تاج.. بس أنا هأبدأ بالتاج ده لأنه أسهل، و الإجابة عليه مش محتاجة بحث فى الذاكرة كتير زى تاج الإخوة الأعزاء دافنشى و مصطفى يحيى اللى هيموتوا و يدبسونى فى أى حاجة
طيب نبدأ على بركة الله..
نبدأ
***************
الأول: هل كنت طالب شاطر فى المدرسة ؟
- على حسب المرحلة الدراسية.. كنت فى ابتدائى شاطر موت.. فى إعدادى كنت بليد فى أولى و تالتة، و فى تانية كنت بأطلع الأول على الفصل، بس اكتشفت فى النهاية إنى فى فصل معوقين عشان خاطر أطلع الأول و أنا جايب 230 من 280، و مع ذلك جبت مجموع كبير فى الإعدادية، أما ثانوى فكانت متأرجحة.. و دى حاجة مش بإيدينا دى ثانوية عامة يا جماعة.. على العموم كانت أرحم من الكلية.. أيام الثانوى كان الواحد همه على المجموع.. فى الكلية الخيار بيكون ما بين النجاح و السقوط و مفيش ترف المجموع ده خالص..
الثانى: إيه كانت أحب مادة و أكره مادة ليك فى المدرسة و الكلية ؟
- فى المدرسة كانت أحب مادة ليا الهندسة، و أكره مادة كانت الدراسات الاجتماعية خصوصًا الجغرافيا.. فى الكلية كانت أحب مادة ليا أيام كلية الزراعة هى مادة الكيميا الوصفية، و أكره مادة هى الكيميا العضوية، أما فى آداب جغرافيا فأحب مادة ليا هى المساحة طبعًا و الخرايط، أما أكره مادة فكانت الجغرافيا المُناخية
الثالث: كنت عايز تطلع إيه و إنت صغير ؟
- مممممممممممم.. مرة ظابط، و مرة مؤلف قصص.. بس
الرابع: هل فكرت فى إغلاق المدونة .. و السبب ؟
- مفكرتش.. و السبب إنى لسه فاتحها أساسًا
الخامس: صورتك فى المدونة.. رمزيتها ؟
- بما إنى مش عارف أحط صورة لحد دلوقتى فى البروفايل بتاعى، فأنا هأتكلم عن الصورة الكبيرة اللى أنا حاططها على جنب دى.. رمزيتها الغموض
السادس: طبيعة كتابتك فى المدونة بشكل عام.. سياسة.. قصة.. عبث.. كلام فاضى ؟
- الصراحة هى قصة فى المقام الأول.. و حبة تفلسف على عرض وجهة نظرى فى الحياة.. كلام كبير أوى مش عارف ليه ؟ بس هى دى الحقيقة
السابع: لماذا تدون أصلا ؟
- تقليد.. كل الناس عندهم مدونات إشمعنى أنا ههههههههههههههههه
الثامن: أحلى جملة قيلت لك فى وصف مدونتك ؟
- كل الجمل اللى اتقالت..
التاسع: التعليقات بالنسبة لك.. أهميتها ؟
- أحس إنى مش بأكلم نفسى طبعا.. و إلا أروح أقف قدام المراية أحسن
العاشر: أفضل مدونة قرأتها.. يمكن اختيار عدة مدونات
- صراحة ما أقدرش أحكم دلوقتى خالص.. لسه مشفتش كتير.. بس أعتقد فى مدونة الصديق المغربى م.س أحجيوج و ربما كان فى الأفضل منها بس أنا لسه مش مطلع للدرجة دى
الحادى عشر: حد قل أدبه فى التعليق.. إيه رد فعلك ؟
- مش عارف إذا كان فى خاصية حذف التعليقات الكخة و لا لأ.. بس لو موجودة هأحذف تعليقه و انتهى الأمر.. مش هنزل لمستواه و أرد عليه / أو عليها
الثانى عشر: أسوأ مدونة الاجابة اجبارية يمكن اختيار عدة مدونات هما كتير اصلا ؟أسوأ مدون مهو هتجاوب هتجاوب؟أسوأ بوست؟
- نفس الإجابة اللى قبل اللى فاتت.. لسه ماوصلتش لدرجة إنى أحكم على المدونات.. لما أخد لفة محترمة كده هأرجع أقول
الثالث عشر: إيه اللى هيحصل لايميلك لما تموت ؟
- هيموت معايا
الرابع عشر: إديت الباسوورد لحد قبل كده ؟
- بتاع الايميل ؟ لأ ماحصلش
الخامس عشر: اسمك ؟
- نعم.. مش معقولة مش واخدين بالكم.. عمرو.. كويس كده ؟
السادس عشر: اسم الدلع المشهور وسط أصحابك ؟
- ربنا اكرمنى بخمستلاف اسم دلع.. اللى يقولى ( أيبك ) لأن أبويا اسمه عز الدين، و اللى يقولى ( عزعوز ) برضه عشان أبويا.. الظاهر إن أبويا هو اللى بيدلعوه و أنا ماليش وجود
السابع عشر: عمرك ؟
- مع مطلع الألفية الثالثة و فى السنة السابعة منها و آخر الشهر السابع فيها أيضًا.. يبقى 26 سنة
الثامن عشر: برجك ؟
- الأسد.. مش بأقول آخر سبعة ؟
التاسع عشر: مجال دراستك ؟
- نظم المعلومات الجغرافية، ده طبعا عشان أفخمها إنما الموضوع كله جغرافيا و خلاص و أخرى مدرس جغرافيا
العشرون: شخصيتك نوعها إيه ؟
- بى إم دبليو.. أصل مش فاهم نوعية الشخصية دى.. بس ممكن تقولوا عليا شخصية هادية و بسيطة
الحادى و العشرون: السفر بالنسبة لك إيه ؟
- مغامرة ممتعة
الثانى و العشرون: المود بتاعك ؟
- هدووووووووووووووووووووووء
الثالث و العشرون: وقت فراغك بتعمل فيه إيه ؟
- بأسرح
الرابع و العشرون: الأكلة المفضلة ؟
- كخضار بحب البسلة جدًا.. كفاكهة أحب الموز.. كحلويات أحب الكاستر جدًا.. مخبوزات بأموت فى الجلاش الحلو.. كفاية كده لحسن جعت
الخامس و العشرون: ( هو لسه فاضل كتير ؟ ) الصفات اللى خدتها من بابا ؟
- النوم الكتير
السادس و العشرون: ( باين إنه فاضل كتير ) الصفات اللى خدتها من ماما ؟
- الله أعلم.. ماتت قبل ما أعرف صفاتها كويس
السابع و العشرون: أكتر ست حاجات بتحبها ؟
- هتكلم عن حاجات دنيوية: صوت حبيبتى.. الروايات.. الأفلام.. الكمبيوتر.. الموسيقى.. الصداقة
الثامن و العشرون: أكتر ست حاجات بتكرهها ؟
- برضه حاجات دنيوية: الغباااااااااااااااااااء.. الروتين.. البلطجة.. البجاحة بتاعة الخلق اليومين دول.. الفضوليين.. الإهمال
التاسع و العشرون: الشغل بالنسبة لك ؟
- حياة
الثلاثون: إيه الكمبيوتر و الإنترنت بالنسبة لك ؟
- من مستلزمات الحياة اللى لا غنى عنها
الحادى و الثلاثون: أمررهم لمين ؟
- حبايب قلبى.. نياهاهاهاها.. خدوا عندكم
مصطفى يحيى
محمد النقيب
دافنشى
ايهاب احمد عمر
ريم البرارى المستحيلة
مسمار الروايات
M G S
وليد فكرى
سارة فوكاليز
أظن كفاية عليهم كده
هناك ٩ تعليقات:
الواحد لسه مخلص امتحانات ومش شايف قدامه وداخل في امان الله يطمن على البني ادمين اللي يعرفهم يلاقي نفسه متدبس في تاج وما شاء الله حجم عائلي ..
31 سؤال يا ايبك .. حرام عليك يا راجل ده انا زي اخوك , انت ملكش اخوات ولاد ولا ايه ؟!
انا لسه ناشر بوست من شوية يومين كده وابقى ارد على التاج ده
اسئلة ذكية
واجابات اذكى
لكن السؤال السابع والعشرون خطير جدا يا عمرو
فهمت فهمت واخيرا فهمت
عمونا النقيب:
لا ماليش واحد و تلاتين أخ.. أنا عندى ستة بس.. :)
و بعدين هو أنا عندى مين أعز منك يا عزيزى.. و صدقنى لو لم يكن التاج حجم عائلى أنا مكنتش مررتهولك.. إنت مقامك عالى برضه
bat:
إحم.. بما إنى مش عارف مين اللى بيعلق، فنفسى أفهم إيه وجه الخطورة فى السؤال السابع و العشرين، و إيه اللى ممكن يتفهم منه !!!!!!!!!!!!!!
إجاباتك جميلة يا عمرو
و طبعا متشكرة على التدبيسة دى
الواضح كده إنك ناوى تتفق على مع دافنشى
إن شاء الله هاجاوب على الأسئلة اللى أنا مش جاوبت عليها فى تاجات قبل كده عندى
و ميرسى خالص
مرسي يا عمور علي التمرير ..
مدونتي المهجورة و التي اصبح الاشباح يمرحون بها سوف تنشد مرة اخري عبر هذا التمرير
باذن الله سوف اجيب الاسئلة سريعا رغم انني لا زلت في طور النقاهة عقب الاستجواب العنيف الذي مررت به في منتدي روايات .. ان الواحد يعذب كل هذا الكم من الاعضاء هو شئ صعب جدا ..
مرسي يا عمور مرة ثانية و طبعا لست بحاجة لكي اخبرك ان مدونتك امر عليها يوميا .
ريم العزيزة:
أول زيارة ليكى هنا.. عشان كده و أنا داخل المدونة كان فى نور، قلت يمكن أنا نسيت أطفى النور قبل ما أخرج منها المرة اللى فاتت..
الحمد لله إن الإجابات عجبتك.. و لازم تعرفى إنى لا يمكن أتفق مع دافنشى عليكى.. أنا بينه و بينه تار فوتوشوبى لا يغسله إلا الفوتوشوب
و بعد التار ما يخلص ممكن ساعتها أفكر إنى أتفق معاه
ميرسى على مرورك و أتمنى إنك تجاوبى عشان أبقى أعلق على إجاباتك
عزيزى إيهاب:
كان أول هدف ليا الصراحة إنى أشوف بوستاية واحدة فى مدونتك.. لو شفت بوستاية واحدة بس هأقدر أموت و أنا مستريح.. و متقوليش مش هتكتب عشان ما أموتش.. لا يا خبيبى بالخاء ده مش سبب وجيه
و طبعا لن يفوتنى تلميحك الرقيق على إن الاستجواب اللى فى روايات لتعذيب الأعضاء و ليس لتعذيبك.. و كأن الموضوع هناك أصبح اسمه غرفة لتعذيب الأعضاء أكيد إيهاب عاوز ينتقم
شكرًا على ذوقك و على تشجيعك الدائم، و أسعدتنى جدًا لما قلت إنك بتمر عليها كل يوم.. يا رب تكون فى حاجة تستاهل
تسلم لي يا حبيب قلبي
ردودك فطسطني علي نفسي من الضحك يا عمرو ، بجد ، أنت مشكلة كبيرة جدا
وتقولي مودك الهدوء ، طب إزاي ؟؟
واحشني يا عمور بجد ، وعايز أشوفك ، أنا بنزل لحبيبة قلبي اسكندرية كل جمعة وسبت .
لا هو أنت ما درتتشي .؟؟؟
والله العظيم ما دريتشي ؟؟؟
عاااااااااااا
يعني يا بني آدم أول ما تخرج من الإفرازات والروايح الغريبة اللي كنت غطسان فيها، على طول تجري تدبس الناس كده؟
وغد حقيقي أصيل، مش مجرد مدعي وغدنة!
إرسال تعليق