خلص رمضان.. خلص العيد

طبعًا انتهى رمضان..

و كمان خلص العيد..

و عدنا إلى ما قبل رمضان..

اليوم كله مفتوح على بعضه، و مش عارف إذا كان المغرب أذن و لا لأ.. و العشا بقت على كام..

ممكن تقعد اليوم كله تنسى تاكل، و مع ذلك مش هتاخد بالك،. بعكس رمضان اللى بتكون فيه قاعد مستنى المغرب بفارغ الصبر..

أنا سألت نفسى ليه ؟

اشمعنى دلوقتى قاعد من غير أكل من الصبح و عدى المغرب و لسه مكلتش و مش حاسس بجوع ؟!

فى حين إن فى رمضان كان أول ما أحس إن المغرب قرب، أبدأ أتطلع للأكل و كده

الصراحة لقيت إن الواحد بيكون فى جو تانى.. عارف إنه مش هياكل لأنه صايم، إنما دلوقتى مفيش صيام و ممكن ياكل فى أى وقت، يبقى عادى.. و بالتالى يلاقى الوقت سرقه و ما أكلش..

ما علينا من النقطة دى

النقطة التانية هى التنظيم

ياااااااه.. و الله الوقت فى رمضان منظم، مش هأقول فيه بركة، هو أكيد فيه بركة، بس أنا باتكلم عن التنظيم.. تلاقى مصر كلها بتفطر فى نفس الوقت.. حد يقدر ينظم ميعاد وجبة فى دولة بحالها ؟ أقصاها فى شغل أو مدرسة داخلى.. إنما على دولة ؟

و كمان بتبقى عارف إنك هتصحى الساعة كذا، و تتسحر الساعة كذا، و هتفطر طبعًا على المغرب، و تصلى التراويح الساعة كذا.. كل حاجة بنظام، و مش بتحس إنك منظم إلا لما رمضان يخلص..

لما تلاقى الوقت اللى كنت بتعمل فيه كل اللى إنت عاوزه، مبقاش بيقضى تعمل أى حاجة..

يا ترى هو أنا لوحدى اللى حاسس بكده ؟