لما أكبر. !!

تأهب للنوم.. قبله أبوه على جبينه و أحكم ستر جسده بالبطانية الثقيلة.. ربت على كتفه قائلا:

- أحلام سعيدة يا حبيبى..

قفز الصغير مبعثرًا الغطاء و قد أشع وجهه فجأة صائحًا:

- أنا عاوز أروح فلسطين يا بابا.. تعرف يا بابا لما أكبر ؟ هأسافر هناك و أحارب الإسرائيليين و أنتصر عليهم.. أنا مش بحبهم يا بابا علشان بيقتلوا الأطفال.. شفت يا بابا فى النشرة إزاى قتلوا الولد الصغير فى حضن باباه ؟!.. أكيد ربنا مش بيحبهم علشان كده هيخلينى أنتصر عليهم.. صح يا بابا ؟!

دمعت عينا الأب للحظة، قبل أن يربت عليه مجددًا، و يعيده إلى فراشه مرة أخرى، قائلا:

- صح يا حبيبى.. صح.. إن شاء الله هتكبر و تحاربهم و تنتصر عليهم..

رقد الصغير فى الفراش تاركًا أبيه يغطيه كيفما شاء، بينما كانت عيناه معلقة بالسقف الذى صار يعرض أحلامه..

************

قال لأمه و هى ترقد إلى جواره فى الفراش:

- أنا خايف يا ماما..

- من إيه يا قلب ماما ؟!

- خايف من العساكر بتوع أمريكا.. أنا شفتهم فى النشرة و هما بيدخلوا البيوت فى العراق و يخوفوا الأطفال الصغيرين.. دول طلعوا أوحش من الإسرائيلين يا ماما.. لما أكبر هأروح العراق و أحاربهم كلهم و أنتصر عليهم.. أكيد ربنا بيكرههم علشان هما وحشين و هيخلينى أنتصر عليهم..

ضمته أمه فى حنان و قالت:

- أكيد يا حبيبى ربنا هينصرك طالما أنت مع الحق..

انكمش الصغير فى حضن أمه مغمضًا عينيه.. صار يرتجف..

**************

بعد أن غسل يديه ذهب إلى حجرة المكتب.. أبوه يجلس خلف جهاز كمبيوتر يضرب أزراره بشكل متكرر.. دنا منه و قال:

- بابا ممكن أسألك سؤال ؟!

التفت له أبوه مجيبًا:

- طبعًا يا حبيبى.. اسأل..

صمت الطفل كأنما يرتب أفكاره، ثم قال:

- هما العساكر اللى بيضربوا الناس بتوع المظاهرات دول مش بوليس ؟

- أيوه بوليس يا حبيبى..

- طب مش البوليس المفروض بيقبض على الحرامية ؟!.. يبقى كده بتوع المظاهرات دول حرامية ؟!.. بس أنا بأسمع فى النشرة أن العساكر بيضربوهم ظلم.. و فى البرنامج بتاع (عمرو أديب) بيقولوا أنهم بيسحلوهم و يضربوهم.. يعنى إيه يسحلوهم يا بابا ؟!

- يعنى بيجروهم على الأرض و يضربوهم كمان..

- زى ما كنت بأشوف زمان فى النشرة الإسرائيليين بيجروا الفلسطينيين و يضربوهم باللكميات و الشلاليط.. بس ده حام يا بابا.. أنا لما اكبر هأبقى ظابط علشان أمنع العساكر يضربوا الناس و يسحلوهم..

هز الأب رأسه موافقًا، و هو يتساءل بينه و بين نفسه هل كبر صغيره فجأة ؟!

***************

حين دلف الصغير إلى بيته عائدًا من المدرسة كان يبكى.. هرعت الأم مذعورة.. و تساءل الأب فى جزع:

- إيه مالك بتعيط ليه ؟!

خفض الطفل رأسه و هو يتهانف مجيبًا:

- فى ولد أخد مكانى فى التختة بتاعتى و ضرب صاحبى اللى بيقعد جنبى و جره على الأرض.. و أنا معرفتش يا بابا أضربه و لا عرفت أرجع مكانى تانى..

خفض رأسه أكثر.. انهمرت دموعه أكثر.. بينما ضمه أبوه ليهدىء من روعه..

**************