عمو عاوز النتيجة !!!

سكريبت قصير جدًا.. إحم.. على ما أعتقد !!(*)

************

مشهد 1 - ليل داخلي - سايبر (عمرو)

يقف عمرو فى السايبر يخنق زبائنه من الأطفال (أحباب الله) و يركل مؤخراتهم و يأكل حناجرهم كعادته اليومية، ثم يفاجأ بمجموعة من الصبية لا يقلون عن خمسة تقتحم السايبر، و تحاول المرور من بابه الضيق

عمرو: أنت يا كابتن أنت و هو.. داخلين وكالة ؟

صبي 1: (يتكلم و هو محشور بين الباب و صبي آخر بدين) لا يـ......ــا عمـ......ــو .. إحنا عا.. عا.. عا.. عا.. أوووووووووع (يصرخ بعد تلقي كوع فى فم معدته)

عمرو: أنتوا عا إيه ؟! عفاريت ؟

صبي 2: (يقول من تحت أقدام زملاؤه) لا يا عمو.. إحنا عاو.. عاو.. عاوو.. آآآآآآآآآآآآآآآآآه (يصرخ بعد أن داس على وجهه أحدهم)

عمرو: (فى فزع) عاو كمان ؟! دي ليلة إيه دي !!!

صبي 3: (البدين بنفسه) يا عمو العيال دي بنص لسان.. إحنا عاوزين ناخد النتيجة..

عمرو: يا فصيح أنت يا فصيح.. نتيجة إيه اللى عاوزين تاخدوها.. محدش شايل عندي نتايج..

صبي 3: متخنقنيش بقى يا عمو.. إحنا عاوزين النتيجة..

عمرو: ( ببلطجة) هو أنت مستقوي نفسك ياض ؟!.. ما بأقولك محدش شايل عندي نتايج !!

صبي 3: اللهم طولك يا روح.. مش ده سايبر برضو ؟

عمرو: لا مخبز آلي..

صبي 4: (من تحت إبط أحدهم) طب كويس يا عمو لحسن بابا واقف فى طابور من شهر خمسة و مش عارف يجيب رغيف.. إديني بجنيه..

عمرو: (يشمر عن أكمامه رغم أنه يلبس قميص نص كم) بأقولكوا إيه شكلكوا كده شوية عيال نصابة و داخلين فى دور لبط و أنا بقى اللى هأروقكوا..

صبي 4: يا عمو حرام عليك أنا هاموت من ريحة المعفن ده.. إحنا عاوزين نتيجة الإعدادية.. مش أنت عندك نت برضو..

عمرو: (يقول بوجه مشرق) يااااااااااااااااااااه.. مش تقولوا كده من الصبح.. عاوزين منها إيه بقى النتيجة ؟!

قطع

*************

مشهد 2 - ليل خارجي - أمام باب السايبر

بعد ساعة - ضوضاء عالية أمام باب السايبر و جموع الصبية طالبي نتيجة الإعدادية تتزايد، ثم يمر رجل عجوز..

الرجل العجوز: (يقول لأحد الصبية و هو يمر بالتجمهر) هو في إيه يا بني ؟

الصبي: مش عارف يا حاج.. ما أنا واقف أشوف أهو..

صبي آخر: بيقولوا بيوزعوا تذاكر كاس الأمم الأوروبية

الرجل العجوز: (فى استغراب) مش البطولة دي خلصت و إحنا اللى كسبنا ؟

الصبي: يا حاج أنت من كوكب تاني و لا إيه ؟ إحنا فى أفريقيا.. أنا بأقولك الأمم الأوروبية.. إيطاليا بقى و فرنسا و ريال مدريد..

الرجل العجوز: لا مؤاخذة يا بني أصلي مش باتابع الكورة خالص من أيام الضظوي و صالح سليم.. دي أيام الكورة و مش هترجع تاني.. مش تقولي الخطيب و إكرامي..

الصبي: لا حول ولا قوة إلا بالله.. يا حاج إحنا دلوقتي فى أيام أبو تريكة و شيكابالا..

الرجل العجوز: أنتوا كده يا جيل اليومين دول.. تاخدوا الأجانب مثل أعلى و تسيبوا رموزكم الوطنية..

يلتقط الصبي طوبة من الأرض و يضرب نفسه بها ليسقط مغشيًا عليه

قطع

*************

مشهد 3 - ليل داخلي - سايبر (عمرو)

بعد ساعتين - عمرو يقف على كرسي فى آخر السايبر و تحته عشرات الصبية يرفعون أيديهم لأعلى على اليمين، بينما كانت الفتيات على اليسار

عمرو: (أحمد السيد مرسي).. خد يا فاشل يا ضايع.. 160 من 280 .. أنت كنت بتخش اللجنة بقفاك و لا إيه ؟

أحمد السيد: (يأخذ الورقة صائحًا) نجحت يا بشرررررررررر.. أبويا هيجيبلي الموباييييييييييييييييل..

عمرو: ( يتطلع له بدهشة) طب هات الجنيه يا مفتح ( يناوله أحمد الجنيه قبل أن ينادي على من بعده).. (هيثم عطيتو مفتاح).. جدع ياض.. مجموعك 260 تلاقي أبوك هيجيبلك قمر صناعي..

هيثم: (يأخذ ورقته) لا أنا أبويا وعدني يجيبلي ماوس بدل بتاع الكمبيوتر اللى باظ

عمرو: طب بلاش ندالة و تعالى اشتريه من عندي.. استنى رايح فين.. اطلع بالمعلوم أنا مش فاتح ملجأ.. اللى بعده.. (عمر محمد عبد الرحيم).. الله يخرب بيتك.. حد يسقط فى الرسم ؟!.. أنت أهبل ياض ؟!

عمر: (يجاهد للقفز فوق زملاءه كي يأخذ ورقته) معلش يا مستر أصلي نسيت المقلمة و الألوان فى البيت..

عمرو: مستر ؟! مش بأقولك أهبل.. أنت بقى هتجيب اتنين جنيه عشان غباوتك دي.. (يصيح فى بقية الصبية) وسع يا بني منك ليه خلوا أخواتكوا البنات يعرفوا ياخدوا نتايجهم.. فين (نانسي طارق عبد الوهاب) ؟!

نانسي: (تصرخ من بين الفتيات) أنا هنا.. أنا هنا.. أنا هنا.. أنا هنا.. أنا هنـ.......

عمرو: (مقاطعًا) عرفت خلااااااااااااااص.. و مالك متسربعة على إيه !!! من شطارتك ؟! على الأورمان بتاعة الفنادق يا ختى..

تصرخ نانسي و تسقط فاقدة الوعي

عمرو: شوفي لو بتموتي.. هتجيبي الجنيه يعني هتجيبيه.. اللى بعده !!

قطع

******************

مشهد 4 - ليل خارجي - أمام باب السايبر

بعد ثلاث ساعات - يقف التمرجي فى زيه الأبيض إلى جوار باب سيارة الإسعاف الواقفة أمام باب السايبر

التمرجي: (ينادي) قرب قرب قرب.. عندنا خدمة التوصيل للمستشفيات فقط لضحايا الإعدادية..

سيدة بدينة: تاخدنيش معاك لحد القلعة يا أخويا ينوبك ثواب..

التمرجي: إحنا مش فى موقف يا ستي ربنا يحنن عليكي.. روحي خديلك توك توك..

تعلو صرخة من داخل السايبر..

التمرجي: (ينادي زملاءه) يلا يا جدعان الظاهر في ضحية جديدة..

يهرع اثنان بالمحفة للداخل، و سرعان ما يخرجون بملابس ممزقة و على المحفة فتاة فاقدة الوعي

التمرجي: فهمتوها إن الأجرة جنيه و نص ؟.. البنزين زاد و مش عاوزين عوء !!

زميله 1: أفهمها إزاي دي مسخسخة..

التمرجي: فوقها يا أخويا.. هو إحنا مش إسعاف و لا دي عربية فول ؟.. (يلتفت إلى السائق متسائلا) فاضل كام نفر يا أسطي ؟!

السائق: فاضل واحد..

التمرجي: مينفعش نركب زيادة ؟!.. الرزق كتير و العجل قليل..

السائق: ينفع بس مش هنلاقي نركبلهم جلوكوز..

التمرجي: لا يبقى كفاية واحد.. المرور يخربوا بيتنا بعدين لو شافوا واحد راكب من غير جلوكوز.. خلينا فى السليم الله لا يسيئك..

يخرج صبي من السايبر مترنحًا..

الصبي: خدوني معاكم أنا مش شايف.. الريحة جوه هتنفع أمريكا أوى فى الحرب الكيماوية.. العيال دي كلها آكلة كرنب النهاردة و لا إيه ؟

التمرجي: يا عم اركب اركب إن شالله كانوا أكلين فيران مسلوخة.. (يخبط على سطح سيارة الإسعاف صائحًا) يلا يا أسطي العدد كمل.. ارجعلنا بسرعة و حياتك مفيش عجل على الأرض..

يركب الصبي و تنطلق سيارة الإسعاف..

قطع

***************

مشهد 5 - ليل داخلي - سايبر (عمرو)

قرب منتصف الليل - سقط عمرو على كرسي المكتب شاحب الوجه لا يستطيع فتح عينيه، بعد أن غادره آخر صبية الإعدادية..

يسمع فجأة صوت فرملة خارج السايبر، فيشرئب بعنقه ليلقي نظرة عبر الباب، فيجد أوتوبيس كبير يهبط من أبوابه طوابير من الأطفال الذين هرعوا نحو باب السايبر بكل حماس..

ينهض عمرو و يقف أمام الباب بعينين متسعتين هلعًا.. لكن الأطفال لا يتوقفون فيرتطمون به و يسقطونه أرضًا ليمروا من فوقه..

يسمع عمرو قبل أن يفقد الوعي أحد الأطفال يصيح

الطفل: عاوزين نتيجة تالتة ابتدائي يا عمووووووووووووووو

قطع

********************

(*) مستوحي من وقائع يوم ظهور النتيجة التي عاشها كاتب الاسكريبت (الذي هو أنا طبعًا)